Қазақстанда тіс импланты мен протездеу қызметі қымбаттады – зерттеу

Қазақстанда тіс протездеу мен имплантация қызметтерінің бағасы айтарлықтай қымбаттады. ҚР Ұлттық статистика бюросының деректеріне сәйкес, 2026 жылдың қаңтар-наурыз айларында протездеу 13%-ға, ал имплантация 10%-ға қымбаттаған. Бұл туралы Ranking зерттеуінде жазылған, деп хабарлайды Azattyq Rýhy.

Жалпы, стоматологиялық қызметтің бес түрі бойынша баға қымбаттаған. Ең жоғары қымбаттау: тіс жегісін емдеу – 17,7%, тіс жұлу – 14,7%. Ал кәсіби тазалау қызметі 12%-ға өскен.

Сарапшылардың айтуынша, Қазақстанда тіс имплантациясы уақыт өткен сайын қымбат қызметке айналып келеді. Алматы мен Астанадағы ашық деректерге жүргізілген талдау нәтижесінде бұл қызметтердің бағасы айтарлықтай ауқымда өзгеретіні анықталған.

Мәселен, ең қолжетімді нұсқалардың бірі – металды керамикалық тәж орнату. Оның бағасы 46 мыңнан 180 мың теңгеге дейін барады. Ал цирконий құны 95 мыңнан 220 мың теңгеге дейін жетеді.

Ең қымбат стоматологиялық қызметтердің бірі – All-on-4 әдісі арқылы имплантация. Бұл тәсіл бір жақ сүйекке төрт имплант орнатып, толық тіс қатарын қалпына келтіруге мүмкіндік береді. Мұндай емнің құны 790 мыңнан 2,5 млн теңгеге дейін жетеді.

Екі жақ сүйекке бірдей имплантация жасалған жағдайда, жалпы шығын 1,6 млн-нан 5 млн теңгеге дейін өсуі мүмкін. Бағаның жоғары болуы импланттардың құнына ғана емес, процедураның күрделілігіне, 3D-модельдеу қолданылуына және бірнеше маманның қатысуына байланысты.