«Ұлымды Жайық өзеніне итеріп жіберген»: марқұмның анасы істі қайта қозғауды талап етті

Атырауда 2024 жылы қаза болған 14 жастағы Мерланның туыстары тергеуді қайта жандандыруды талап етіп отыр. Жасөспірім Жайық өзеніне батып кеткен, алайда жақындары оқиғаны басқаша болмағанына сенімді, деп хабарлайды Azattyq Rýhy агенттігі «Ақ Жайық» басылымына сілтеме жасап.

Марқұмның анасы Анаргүл Қасантаева ұлын әдейі суға итеріп жіберген болуы мүмкін екенін мәлім етті. Ол істі «Абайсызда адам өліміне әкеп соқтыру» бабынан «Адам өлтіру» бабына қайта саралауды талап етіп отыр.

«Ұлымды Жайық өзеніне итеріп жіберді, соның салдарынан ол көз жұмды. Мұны жасаған бала қазір бостандықта жүр. Ол небәрі 60 мың теңге көлемінде айыппұл төлеп, тек есепке алынған, бірақ күдікті ретінде танылған. Оқиғаны көріп тұрып үндемегендер де жауапқа тартылуы тиіс. Қатысы барлар кінәсін мойындағаны туралы бір-бірімен хат алмасқан. Мұның бәрін сараптамаға жіберу қажет», – деді әйел.

Отбасының адвокаты істі қайта және жан-жақты қарау үшін оны Бас прокуратураға жолдауға ниетті екенін мәлімдеді.

Атырау облыстық полиция департаментінде тергеу барысында қажетті барлық тергеу әрекеті жүргізілгенін, оқиғаға қатысы бар тұлғалар анықталып, сараптамалар тағайындалғанын түсіндірді. Алайда іс заңдық негіздерге байланысты тоқтатылған.

«Тергеу барысында барлық қатысы бар тұлға анықталып, олардың жауаптары алынды және сараптамалар тағайындалды. Алайда күдікті қылмыстық жауапкершілік жасына толмағандықтан, іс ҚР ҚПК-нің 35-бабы («Іс жүргізуді болдырмайтын мән-жайлар») негізінде тоқтатылды», – деп хабарлады полиция.

Айта кетейік, қайғылы оқиға 2024 жылы болған, жасөспірім жоғалып кеткеннен кейін біраз уақыт өткен соң оның мәйіті Жайық өзенінен табылған.