Нәрестенің салмағы 5 келі болып туған
Қостанай облысының Рудный қаласында ерекше жағдай тіркелді, деп хабарлайды Azattyq Rýhy.
Жергілікті тұрғын салмағы 5 келіден асатын қыз баланы өмірге әкелді. Рудный қалалық көпсалалы ауруханасының мәліметінше, нәресте перинаталдық орталықта 10 сәуір күні дүниеге келген. Сәбиге Ляйсан есімі берілді. Оның салмағы – 5190 грамм, бойы – 55 сантиметр.
Дәрігерлердің айтуынша, әйел кесарь тілігі арқылы босанған. Операцияны тәжірибелі акушер-гинекологтар жасапты. Қазір ана мен баланың жағдайы жақсы.
Сәбидің анасы Индира жүктіліктің соңғы апталарында мұндай нәтижені тіпті күтпегенін айтады.
«37 аптада УДЗ-дан өткенімде, дәрігерлер қызымның салмағы шамамен 3700 грамм деді. Бірақ 41 аптаға дейін ол 5 келіге дейін өседі деп ойламадым. Шынымды айтсам, қатты таңғалдым. Қазір қызымыздың жағдай жақсы, тәбеті де жаман емес. Жиі еміп жатыр», - дейді ол.
Бұл сәби Индираның екінші баласы. Оның тұңғышы 3100 грамм салмақпен дүниеге келген.
Айта кетейік, 2026 жылдың басынан бері Рудный қалалық перинаталдық орталығында салмағы 5 келіден асатын төрт сәби туған. Мамандар мұндай жағдай сирек кездескенімен, медицина үшін қалыпты құбылыс екенін атап өтті.