«Мөлдір бұлақ»: Алматыдағы сенбілікке 40 мыңға жуық адам қатысты

Бүгін, 11 сәуірде Алматыда «Таза Қазақстан» республикалық бағдарламасы аясында «Мөлдір бұлақ» экологиялық науқаны өтті. Қаланың санитарлық жағдайын жақсартуға бағытталған шараға мыңдаған тұрғын мен жүздеген арнайы техника жұмылдырылды, деп хабарлайды Azattyq Rýhy.

Экологиялық шара шаһардың 8 ауданындағы 23 аумақты қамтыды. Қала әкімдігінің мәліметінше, сенбілікке 36 300 адам қатысып, қаланы қоқыстан тазартуға атсалысқан. Сондай-ақ жұмыс барысында 365 арнайы техника жұмылдырылды.

Бір күн ішінде атқарылған жұмыстардың қорытындысы:

• Қала аумағынан 2590 текше метр қоқыс пен қалдық шығарылды;
• Көгалдандыру мақсатында 50 ағаш пен 700 бұта егілді;
•  Арық арналары толық тазартылды.

Тұрғындардың ең көбі Медеу және Алатау аудандарында тіркелді. Бұл өңірлерде 15 мыңнан астам адам сенбілікке шыққан. Сондай-ақ Бостандық, Әуезов және Наурызбай аудандарында да ауқымды тазалық жұмыстары жүргізілді.

Эко-акция барысында қаланың басты су артериялары мен демалыс орындарына ерекше көңіл бөлінді:

1. Үлкен Алматы, Есентай және Қарасу өзендерінің жағалаулары;

2. Аула аумақтары мен қоғамдық кеңістіктер және саябақтар.

«Мөлдір бұлақ» науқаны Алматының экологиялық ахуалын жақсартумен қатар, тұрғындар арасында санитарлық мәдениетті қалыптастыруды көздейді.