Елімізге келушілер саны бірнеше жылда еселеп өсіп, көршілес елдер көш бастап тұр
2025 жылы Қазақстанға 15,7 млн шетелдік азамат келген, деп хабарлайды Azattyq Rýhy.
Туризм және спорт министрлігінің дерегінше, соңғы жылдары елге келетін шетелдік саяхатшылар саны тұрақты түрде өсіп келеді. Егер 2020 жылы бұл көрсеткіш 2 млн болса, 2021 жылы – 1,3 млн, 2022 жылы – 4,7 млн, 2023 жылы – 9,2 млн, 2024 жылы – 15,2 млн-ға жеткен. Ал 2025 жылы көрсеткіш 15,7 млн-ға дейін артқан.
Министрлік мәліметінше, Қазақстанға келетін туристердің басым бөлігі көршілес мемлекеттерден. Былтырғы қорытынды бойынша алғашқы ондыққа енген елдер қатарында Өзбекстан (5 590 173), Қырғызстан (3 545 701) және Ресей (3 502 093) көш бастап тұр.
Сондай-ақ Қытайдан 968 838, Тәжікстаннан 883 758 адам келген. Беларусьтен 167 116, Үндістаннан 157 845, Түркиядан 135 952, Әзербайжаннан 96 834 және Германиядан 95 229 турист тіркелген.
Жалпы алғанда, Қазақстанға шетелдік саяхатшылар ағынының күрт артуы елдің туристік тартымдылығының күшейгенін және халықаралық қатынастардың жандана түскенін көрсетеді.