Шымкентте есірткі жарнамалап жүрген ер адам ұсталды

Шымкентте полицейлер тұрғын үйлердің қабырғалары мен қоршауларға есірткі сататын интернет-ресурстарды жарнамалайтын жазбаларды қалдырып жүрген ер адамды ұстады, деп хабарлайды Azattyq Rýhy.

Тергеу мәліметінше, ол қаңтар айынан бастап қала аумағында жүйелі түрде граффити салып, мессенджерлер арқылы жұмыс істейтін есірткі тарату арналарына сілтемелерді насихаттаған.

Күдікті кезекті жазбаны қалдыру кезінде қылмыс үстінде ұсталып, қамауға алынды. Қазіргі таңда тергеу әрекеттері жүргізіліп жатыр.

«Полиция есірткі жарнамасын орналастыру – азаматтарды есірткінің заңсыз айналымына тартуға бағытталған қылмыстық схеманың бір бөлігі екенін еске салады. Қала аумағында мұндай қылмыстарды анықтау және жолын кесуге бағытталған жұмыстар жүйелі түрде жалғасады», – делінген ПД хабарламасында.