Қақтығыстар 26 ақпанда басталған
Пәкістан билігі Ауғанстанмен шекара маңында кемінде 30 «Талибан» қозғалысының содырын жойған, деп хабарлайды Azattyq Rýhy.
Пәкістан Қарулы күштерінің мәліметінше, қақтығыс Исламабад маңында содырлар пәкістандық шекара бекеттеріне оқ атқаннан кейін басталған.
Жауап ретінде артиллерия мен дрондар қолданылып, шабуылдаушылардың болжамды позицияларына соққы жасалған.
Операция шекараның бірнеше секторында жүргізілген. Әскердің әрекеті өңірдегі қауіпсіздікті қамтамасыз етуге және жағдайдың одан әрі ушығуына жол бермеуге бағытталған.
Ауғанстанда билікті бақылап отырған «Талибан» ұйымы Пәкістанның әскери позицияларына қарсы Дюранд сызығы бойында ауқымды шабуыл операциясын бастағанын мәлімдеді.
Қақтығыстар 26 ақпан күні кешке басталған. Талибандар әкімшілігінің өкілі Забихулла Муджахид Twitter желісіндегі парақшасында бұл операция пәкістандық әскерилердің «қайталанатын арандатушылықтары мен заңбұзушылықтарына» жауап екенін жазған. Ол Пәкістанның шекара бойындағы әскери нысандарына қарсы «ауқымды шабуыл операцияларының» басталғанын мәлімдеді.
Сондай-ақ Муджахид «арнайы лазерлік бөлімшелердің» жұмылдырылғанын хабарлап, олардың түн қараңғылығын пайдаланатынын айтқан.
Пәкістанның Ақпарат министрлігі ауған бөлімшелері тарапынан «арандатусыз оқ атылғанын» мәлімдеді. Исламабад нұсқасы бойынша, талибандар Хайбер-Пахтунхва провинциясындағы бірнеше секторға оқ жаудырған, содан кейін пәкістандық әскерилер «жедел әрі тиімді жауап» беріп, қарсы тарапқа ауыр шығын келтірген және бірнеше бекет пен техника бірлігін жойған.
Агенттікпен аты-жөнін атамау шартымен сөйлескен пәкістандық шенеуніктердің айтуынша, атыс екі сағаттан астам уақытқа созылған. Исламабадта сондай-ақ ел бойынша күштердің жоғары дайындық режиміне көшірілгені және «барлау деректеріне негізделген операциялардың» жеделдетілгені хабарланды. Олардың мәліметінше, ондаған күдікті содыр мен олардың сыбайластары, оның ішінде Ауғанстан азаматтары ұсталған.
Бұл шиеленіс Пәкістан армиясы демалыс күндері Ауғанстанның шығысындағы нысандарға жасаған әуе соққыларынан кейін күшейе түсті. Исламабад «Tehrik-i-Taliban Pakistan» (TTP) лагерлері мен «Islamic State – Khorasan Province» ұйымының ұяшықтарына соққы бергенін мәлімдеген. Ал Кабул мұндай базалардың барын жоққа шығарып, бейбіт тұрғындардың қаза тапқанын айтқан. Бұған дейін талибандар Пәкістанның әрекеттеріне «лайықты әрі салмақты жауап» беретінін ескерткен болатын.