Биыл астанада 50 қоғамдық орын абаттандырылады
Арқар көпірінің астындағы алаң Нұр-Сұлтанның тұрғындары мен қонақтары үшін көрікті орынның біріне айналды. Онда жаңа арт-инсталляциялар, гүлзарлар, жаяу жүргіншілер, велосипед жолдары және баскетбол алаңдары салынды, деп хабарлайды Azattyq Rýhy тілшісі қала әкімдігінің баспасөз қызметіне сілтеме жасап.
«Бұрын көпір құрылысы Триатлон мен Президент саябағын бір-бірінен бөліп тұрғандай көрінетін. Қазір жаңа кеңістік қалалық қауымдастықтарды біріктірді», – деді Урбанистика орталығының жетекшісі Елнар Базыкен.
Сондай-ақ ол нысан өз атмосферасын қалыптастырып, қала тұрғындары арасында шығармашылық кластердің дамуына ықпал ететінін атап өтті.
«Бұл жердің шағын бизнес үшін әлеуеті жоғары екенін атап өткен жөн. Екі саябақтың жаяу жүргінші мен велосипед жолы бар жалғыз байланысы екенін ескерсек, бұл орын қоғамдық тамақтану орындарына тамаша жағдай жасайды. Бұл өз кезегінде жаңа жұмыс орындарын ашуға ықпал етіп, әлеуметтік белсенділікті арттырады», – деді Е.Базыкен.
Айта кету керек, биыл астанада барлығы 50 қоғамдық орын (саябақтар, алаңдар, бульварлар) және 150-ге жуық аула абаттандырылады. Аулалар мен қоғамдық орындар «Нұр-Сұлтан – тұрғындарға жайлы қала» атты елорданы одан әрі дамыту жоспарының тұжырымдамасы аясында абаттандырылуда.