Астанада небәрі бір ай ішінде ондаған баланы көлік қағып кетті

Астанада 2026 жыл басталғалы бері қала көшелерінде ондаған баланы көлік қағып кеткені белгілі болды, деп хабарлайды Azattyq Rýhy.

Қала әкімдігінің мәліметінше, елордадағы оқу орындарының маңында сабақтың басталуы мен аяқталуы кезінде патрульдеу күшейтілді, жылдамдық режимін сақтау мен жаяу жүргіншілер өткелдерінен өту ережелерінің орындалуына ерекше назар аударылуда.

Жыл басынан бері елордада кәмелетке толмағандардың қатысуымен шамамен 30 жол-көлік оқиғасы тіркелген.

Ата-аналарға балаларға жолда қауіпсіз жүріс-тұрыс ережелерін үнемі еске салу ұсынылады:

• жолды тек белгіленген жерлерден және бағдаршамның рұқсат беретін белгісінде, көліктің толық тоқтағанына көз жеткізгеннен кейін ғана кесіп өту;
• жолдан өту кезінде құлаққап пен ұялы телефонды пайдаланбау;
• қоғамдық көлікке міну және түсу барысында сақ болу;
• қараңғы уақытта киімге жарық шағылыстыратын элементтерді тағу.