Ол қарудан өзіне оқ атқан
Шығыс Қазақстан облысында әскери қызметін өтеп жүрген сарбаз кезекшілік кезінде мерт болды. Құрлық әскерлері баспасөз қызметінің мәліметінше, жауынгер өз-өзіне оқ атқан, деп хабарлайды Azattyq Rýhy.
Қайғылы жағдай 23 қаңтарда Өскемен гарнизонына қарасты әскери бөлімдердің бірінде орын алған. Сарбаз сол сәтте қарауыл қызметінде болған.
Сарбаз өзіне бекітілген қарудан оқ атқан. Алған жарақаты салдарынан ол оқиға орнында көз жұмды. Қаза тапқан азамат мерзімді әскери қызметке өткен жылдың сәуір айында шақырылған. Оның қызмет мерзімі аяқталуға жақын қалған еді.
Қазіргі уақытта бұл факт бойынша ІІМ Шығыс өңірлік әскери-тергеу басқармасы қылмыстық ісқозғады. Тергеу барысы Өскемен гарнизоны Әскери прокуратурасының жеке бақылауында.
Қорғаныс министрінің тапсырмасымен оқиға орнында министрдің орынбасары, генерал-майор Асқар Мұстабеков бастаған арнайы комиссия жұмыс істеп жатыр. Мамандар сарбаздың мұндай қадамға баруына не себеп болғанын анықтау үстінде.
Қорғаныс министрлігі мен Қарулы Күштердің басшылығы қаза тапқан сарбаздың туған-туыстары мен жақындарына қайғырып көңіл айтады. Ведомство өкілдері заң аясында отбасына барлық қажетті көмек көрсетілетініне уәде берді.
«Тергеу мүддесіне байланысты өзге ақпарат жария етуге жатпайды», — деп атап өтті баспасөз қызметі.