Заңсыз кәсіпті өз бетінше дөңгелеткен ауыл тұрғыны ұсталды
Ақмола облысының полицейлері құрамында алтыны бар материалдарды заңсыз өңдейтін шағын цехтың жұмысын тоқтатты. Заңсыз кәсіпті өз бетінше дөңгелеткен ауыл тұрғыны ұсталды, деп хабарлайды Azattyq Rýhy өңірлік Полиция департаментінің баспасөз қызметіне сілтеме жасап.
Жедел-іздестіру шаралары барысында заңсыз өндіріс орны Зауыт кентінен табылды. Тәртіп сақшылары жасырын цехты тінту кезінде алтын өңдеуге арналған арнайы қондырғыларды анықтаған.
Астыртын бизнестің иесі — Ақсу кентінің 38 жастағы тұрғыны. Ол құрамында алтыны бар шикізатты өңдеу процесін өз бетінше ұйымдастырып, жолға қойған. Полицейлер арнайы жабдықтарды және қылмысты дәлелдейтін өзге де заттай айғақтарды алып кетті.
Аталған дерек бойынша Қазақстан Республикасы Қылмыстық кодексінің 295-1-бабы 1-бөлігі(Бағалы металдардың заңсыз айналымы) бойынша қылмыстық іс қозғалды.
Қазіргі уақытта сотқа дейінгі тергеу амалдары жүріп жатыр. Тәртіп сақшылары заңсыз алтынның қайдан алынғанын және оның қайда сатылып келгенін анықтап жатыр.
Еске сала кетейік, бағалы металдардың заңсыз айналымы үшін ірі мөлшерде айыппұл немесе бас бостандығын шектеу жазасы қарастырылған.