Шымкентте смарт-дәретхананы вандалдар бүлдіріп кетті
Шымкентте екі жас жігіт қаладағы смарт-дәретханадағы фенді сымымен бірге жұлып алып кеткен. Бұл туралы Azattyq Rýhy агенттігі Otyrar.kz-ке сілтеме жасап хабарлайды.
Жоба координаторлары полицияға арыз жазды. Құқық қорғау органдарына хабарласқаннан кейін екі шымкенттік ерікті түрде бөлімшеге келіп, өздерінің кінәсін мойындап, келтірілген зиянды өтеуге уәде берді.
«Мен дәретханада беті-қолымды жуып тұрып, абайсызда фенді жұлып алдым. Біз оны ұрлауды ойлаған жоқпыз, тек жөндеп, қайта қайтаруды жоспарладық. Әкімдік пен жоба координаторларынан кешірім сұраймыз. Біз жөндеу шығындарын төлеуге дайынбыз», – деді бір жас жігіт.
Айта кетейік, Шымкенттегі смарт-туалеттер жиі вандалдық әрекеттерге ұшырайды – жабдықтары бұзылып, құбырлары бітеледі, интерьеріне зақым келеді. Бір объектінің құны – шамамен 50 млн теңге.