Солтүстік Аралдың көлемі қазіргі уақытта 23 млрд текше метрге дейін ұлғайды
Солтүстік Арал теңізінің ауданын 34 текше шақырымға дейін, ал оның аумағын 4-5 жыл ішінде 3 913 текше шақырымға дейін жеткізу жоспарланып отыр. Президенттің Ұлттық құрылтайда айтылған тапсырмаларын орындау аясында теңізді сақтау жөніндегі шаралар туралы Үкімет отырысында су ресурстары және ирригация министрі Нұржан Нұржігітов баяндады, деп хабарлайды Azattyq Rýhy.
Оның айтуынша, су аз болған кезде де тұрақты су ағынын қамтамасыз ету туралы Өзбекстан Республикасымен келісімге қол қойылған. Солтүстік Аралдың көлемі 2023 жылдың басындағы 18,4 млрд текше метрден қазіргі уақытта 23 млрд текше метрге дейін ұлғайды.
Көкарал бөгетін реконструкциялау және су деңгейін 44 метрге дейін көтеруді қамтитын теңізді сақтау жөніндегі жобаның екінші кезеңін әзірлеу аяқтау сатысында тұр.
Түркістан және Қызылорда облыстарындағы суару жүйелерін жаңғырту және автоматтандыру бойынша 167 жобалық-сметалық құжаттама әзірленуде. Су үнемдеу технологиялары 143,1 мың гектар жерге енгізілді, бұл шамамен 500 млн текше метр су үнемдеуге мүмкіндік берді.
«Солтүстік Арал теңізін сақтау және қалпына келтіру біз үшін тек экологиялық қана емес, әлеуметтік және стратегиялық міндет болып саналады. Үнемделген су ресурстарының бір бөлігін экожүйелерді қолдауға бағыттау – өңірдің тұрақтылығына, халық денсаулығына және келесі ұрпақтардың болашағына қосылған үлес», – деп атап өтті министр.