40 градус аяз бен боран: Елдің басым бөлігінде дауылды ескерту жарияланды

Қазақстанның 16 облысы мен Астанада 15 қаңтарға дауылды ескерту жарияланды, деп хабарлайды Azattyq Rýhy

«Қазгидромет» дерегінше, ел аумағында қар, көктайғақ, тұман және қатты жел күтіледі, ал кей өңірлерде ауа температурасы -40 градусқа дейін төмендейді.

Синоптиктердің болжамынша, Қызылорда облысының оңтүстігі мен орталығында түнде қар жауып, күндіз жауын-шашын көбіне қар түрінде түседі. Облыстың бірнеше бөлігінде тұман, көктайғақ болып, бұрқасын жүреді. Желдің екпіні 15-20 м/с-қа дейін жетеді. Қызылорда қаласында да көктайғақ пен бұрқасын күтіліп отыр.

Түркістан облысының таулы аймақтарында жаңбыр мен қар аралас қатты жауын-шашын жауады. Облыстың батысы мен солтүстігінде жел күшейіп, таулы өңірлерде оның жылдамдығы 28 м/с-қа дейін барады. Шымкент пен Түркістан қалаларында да желдің екпіні 15-20 м/с болады.

Алматы облысының таулы және оңтүстік аудандарында тұман түседі. Облыстың солтүстігі мен батысында жел күшейеді. Алматы мен Қонаев қалаларында түнде және таңертең тұман күтіледі.

Астанада жолдар көктайғақ болып, жүргізушілерге ерекше сақтық қажет. Ақтөбе облысында қар жауып, жаяу бұрқасын соғады. Кей жерде желдің екпіні 25 м/с-қа дейін жетуі мүмкін.

Маңғыстау, Атырау және Батыс Қазақстан облыстарында да қар, жаңбыр, көктайғақ және тұман күтіледі. Ақтау, Атырау, Орал қалаларында ауа райының қолайсыздығына байланысты жол қозғалысы қиындауы мүмкін.

Қарағанды және Ұлытау облыстарында бұрқасын жүріп, жел күшейеді. Кей аудандарда оның жылдамдығы 28 м/с-қа дейін жетеді. Жезқазған мен Қарағанды қалаларында да қатты жел болжанып отыр.

Синоптиктердің мәліметінше, 15-17 қаңтар аралығында Павлодар және Шығыс Қазақстан облыстарының солтүстігі мен шығысында түнде ауа температурасы -40 градусқа дейін төмендейді. Бұл өңірлерде қалың аяз бен тұман күтіледі.

Сонымен қатар Абай, Қостанай, Жамбыл, Жетісу және Ақмола облыстарында да тұман, көктайғақ және қатты жел болжанып отыр. Тараз бен Көкшетау қалаларында жолдар мұздап, көлік қозғалысына қауіп төнуі мүмкін.

Төтенше жағдайлар қызметі тұрғындарды алыс жолға шықпауға, ауа райы күрт нашарлаған кезде қауіпсіздік шараларын сақтауға шақырады.