Суретте қаңтардан бастап ол ел президенті Трамп деп жазылған
АҚШ президенті Дональд Трамп Truth Social әлеуметтік желісіндегі парақшасында әзіл-сықақ сипатындағы жазба жариялап, өзін Венесуэланың уақытша президенті ретінде көрсеткен суретін жариялады, деп хабарлайды Azattyq Rýhy.
Сурет «Уикипедиядағы» Трамптың өмірбаянының скриншоты стилінде жасалған. Онда Трамптың АҚШ-тың 45-ші және 47-ші президенті ретіндегі қызметтерімен қатар, 2026 жылдың қаңтарынан бастап Венесуэланың уақытша президенті деген лауазым да көрсетілген.
3 қаңтарға қараған түні АҚШ «Абсолютті табандылық» атты операция жүргізіп, оның барысында Каракасқа соққы жасап, Венесуэла президенті Николас Мадуро мен оның жұбайы Силия Флоресті тұтқындап, елден алып шықты. Қазіргі таңда ерлі-зайыпты АҚШ-та сот алдында жауап береді. Оларға «есірткі терроризмі», қару сақтау және есірткі контрабандасы бойынша айып тағылған.
Операциядан кейін өткен баспасөз мәслихатында Дональд Трамп Мадуроның енді Венесуэла президенті емес екенін айтып, биліктің заңды түрде ауысуын қамтамасыз еткенге дейін АҚШ Венесуэланы басқаруға дайын екенін мәлімдеді. Сонымен қатар ол венесуэлалық оппозиция жетекшісі Мария Корина Мачадоның ел басқаруға қажетті қасиеттері жоқ деп есептейтінін айтты. Трамптың сөзінше, Венесуэланың вице-президенті Делси Родригес ант берген.
3 қаңтар күні кешке Венесуэланың Жоғарғы әділет трибуналының (TSJ) Конституциялық палатасы Делси Родригесті уақытша президент етіп тағайындады. Трамп егер ол «дұрыс әрекет етпесе», «өте ауыр, тіпті Мадуродан да жоғары баға төлейтінін» ескертті.