Оның туыстары дәрігерлерді айыптап отыр
Жетісу облысында жүкті әйелдің өліміне қатысты тергеу басталды. Марқұм Виктория Наумованың туыстары медициналық құжаттардағы қайшылықтарға нұсқап, дәрігерлерді «құжаттарды қолдан жасады және салғырттық танытты» деп айыптап отыр, деп хабарлайды Azattyq Rýhy.
Марқұмның әпкесі Анастасия Жуктың айтуынша, 2025 жылдың 15 желтоқсанында Виктория жоспарлы тексеруден өткен. УДЗ нәтижесінде тек суы аз екені анықталып, өзге де патологиялар байқалмаған.
16 желтоқсанда Викторияның жағдайы нашарлап, Қарабұлақ аудандық ауруханасына жеткізілген.
17 желтоқсанда ол облыстық перинаталдық орталыққа ауыстырылған. Туыстары Викторияның сол сәтте есі дұрыс, өзі сөйлеп, жүре алатынын айтады.
20 желтоқсанда дәрігерлердің күш салуына қарамастан, 31 жастағы әйел қайтыс болды.
Туыстарының күмәнін тудырған басты жайт — аурухана берген екі түрлі эпикриз.
«23 желтоқсанда алған алғашқы эпикризде 17 желтоқсан күні сағат 8:40-та белгілі бір медициналық препараттың екінші дозасы егілгеннен кейін әйелдің жағдайы күрт нашарлап, септикалық шок басталғаны жазылған. Ал 2026 жылы 9 қаңтарда алған екінші нұсқада бұл препарат туралы мәлімет мүлдем жоқ», — дейді Анастасия Жук.
Сондай-ақ, іштегі шарананың тағдыры да белгісіз. Медицина қызметкерлері оны «утилизацияланды» десе, мәйітханада мұндай биоматериалдың қабылданғаны туралы ешқандай жазба жоқ.
Қазіргі уақытта Виктория Наумованың денесі сот-медициналық сараптамаға жіберілді. Полиция департаменті бұл дерек бойынша қылмыстық іс қозғады.
Оқиғаның барлық мән-жайын анықтау мақсатында кешенді тергеу шаралары жүріп жатыр. Тергеу барысын Полиция департаментінің басшылығы өз бақылауына алды.
Марқұмның артында жолдасы мен жақындары қалды. Олар тергеудің әділ өтуін және кінәлілердің жазалануын талап етеді.