Оның ішінде 20 бала қауіпсіз жерге көшірілді
Алматыда көпқабатты тұрғын үйде шыққан өртке байланысты 60 адам, оның ішінде 20 бала қауіпсіз жерге көшірілді. Оқиға кеше кешкі уақытта қаладағы Рысқұлбеков көшесінде орналасқан 12 қабатты үйде тіркелді, деп хабарлайды Azattyq Rýhy.
Төтенше жағдайлар министрлігінің мәліметінше, өрт 12-қабаттағы пәтерде ашық жалынмен жанған. Оқиға орнына жеткен алғашқы өрт сөндіру бөлімшелері дереу әрекетке көшіп, су беру құралдарын іске қосты.
Автоцистерналар жақын маңдағы өрт гидранттарына қосылып, жалынды ауыздықтау жұмыстары жедел жүргізілді.
Құтқару жұмыстары барысында 60 тұрғын эвакуацияланды; олардың 20-сы – балалар.
Адамдар баспалдақ арқылы сыртқа шығарылған. Дәрігерлік көмекке жүгінгендер туралы ақпарат түспеген.
Мамандардың жедел әрекетінің арқасында оттың өзге пәтерлерге таралуына жол берілмеді. Қазіргі таңда өрт толықтай сөндірілген, оқиғаның шығу себебі анықталып жатыр.
ТЖМ өкілдері тұрғындарды тұрмыстық қауіпсіздік талаптарын сақтауға, әсіресе қыс мезгілінде электр құрылғыларын абайлап пайдалануға шақырды.