Астанада iKomek109 қосымшасы жұмысын уақытша тоқтатады

Астанада iKOMEK109 мобильді қосымшасы 2026 жылдың 1 қаңтарынан бастап уақытша өтініш қабылдамайды, деп хабарлайды Azattyq Rýhy. 

Қала әкімдігі мәліметінше, шектеу цифрлық сервистерді жаңғырту және жүйені жетілдіру жұмыстарына байланысты енгізіліп отыр. Қосымшаның жаңартылған нұсқасы іске қосылғанға дейін тұрғындар өтініштерін басқа арналар арқылы жолдай алады.

Өтінішті қалай жолдауға болады?

iKOMEK109 қызметінің жұмысы толық тоқтамайды. Уақытша кезеңде азаматтар келесі байланыс арналары арқылы хабарласа алады:

Балама байланыс жолдары

• Telegram чат-боты – iKOMEK109
• 109 нөмірі – қалалық және ұялы телефондардан
• Астана қаласы әкімдігінің ресми сайты – www.gov.kz
• Электрондық пошта – 109@ikomekastana.kz
• Әлеуметтік желілер – Facebook және Instagram желілеріндегі ресми парақшалар.

Қала тұрғындарының барлық өтініші бұрынғыдай қабылданып, тиісті қызметтерге жолданады, деп нақтылады қалалық мониторинг және жедел әрекет ету орталығы.

Қала сервистері жаңартылады

Әкімдік өкілдерінің айтуынша, модернизация қызмет көрсету сапасын арттыруға, өтініштерді өңдеу жылдамдығын жақсартуға және цифрлық жүйелердің тұрақты жұмысын қамтамасыз етуге бағытталған.

iKOMEK109 әкімшілігі уақытша қолайсыздық үшін тұрғындардан кешірім сұрады.