Елде авиаинфрақұрылым ауқымды жаңғыртудан өтпек
2026 жылы Қазақстанда жаңа әуежайлар іске қосылып, ішкі және халықаралық әуе рейстерінің саны артады. Бұл туралы Көлік министрлігі Азаматтық авиация комитетінің төрағасы Салтанат Томпиева мәлімдеді, деп хабарлайды Azattyq Rýhy.
Комитет басшысының айтуынша, еліміздің ірі авиациялық хабтарында бірқатар инфрақұрылымдық жоба жүзеге асады. Атап айтқанда, Астана мен Шымкент әуежайларында екінші ұшу-қону жолағының құрылысы басталады.
Сонымен қатар Алматы әуежайының ішкі рейстер терминалы қайта жаңғыртылып, Ақтау әуежайының перронына күрделі жөндеу жүргізіледі.
2026 жылы өңірлік авиацияны дамыту да назардан тыс қалмайды. Жоспарға сәйкес:
Бұл жобалар өңірлердің көлік қолжетімділігін арттырып, ішкі туризмнің дамуына серпін бермек.
Аймақаралық қатынасты дамыту үшін 23 әлеуметтік маңызы бар әуе маршрутын субсидиялау бағдарламасы жалғасады. Бұл шалғай өңірлерге әуе қатынасын қолжетімді етуге мүмкіндік береді.
Сондай-ақ әуежайларда Jet A-1 авиаотынын сақтау және құю жүйесі жаңартылады, бұл авиакомпанияларға қызмет көрсетудің сенімділігін арттырмақ.
Салтанат Томпиеваның мәліметінше, 2026 жылдың соңына дейін авиакомпаниялар тоғыз жаңа ұшақ сатып алады. Нәтижесінде елдегі әуе кемелерінің жалпы саны 118-ге жетеді.
Халықаралық бағыттар да кеңеймек. Орталық Азия, ТМД, Таяу Шығыс, Еуропа және Азия елдеріне жаңа рейстер ашылып, қолданыстағы бағыттардағы ұшу жиілігі артады. Жоспарланған қалалар қатарында Вена, Токио, Рим, Абу-Даби, Эр-Рияд, Шанхай, Варшава және өзге де мегаполистер бар.
Сонымен қатар салада кадр даярлау жүйесін реформалау, жаңа авиациялық оқу орталығын құру, паспорттық бақылау мен жүк рәсімдеу процестерін цифрландыру көзделіп отыр.
2026 жылы ICAO-мен бірлесіп азаматтық авиацияны 2050 жылға дейін дамытуға арналған мастер-жоспар әзірлеу аяқталады. Бұл Қазақстанның халықаралық авиация жүйесіндегі рөлін күшейтуге бағытталған.