Өнеркәсіптік қауіпсіздік деңгейі жіті бақылауға алынды
ҚР Төтенше жағдайлар вице-министрі Ерболат Садырбаев пен Өнеркәсіптік қауіпсіздік комитеті төрағасының орынбасары Кңнгірбай Есенеев «Karaganda Komir» ЖШС-не қарасты Костенко атындағы шахтаға барып, нысанның дайындығын тексерді. Қаралы оқиғамен танымал болған бұл шахтадағы өнеркәсіптік қауіпсіздік деңгейі жіті бақылауға алынды, деп хабарлайды Azattyq Rýhy.
Вице-министр кен орнындағы жұмыс барысымен танысып, жер астындағы қызметкерлердің қауіпсіздігін қамтамасыз ететін бірнеше маңызды жүйені тексерді:
Персоналды іздеу: Жер асты қазбаларында адамдардың орналасқан жерін анықтау және позициялау жүйесі.
Байланыс сапасы: Жер асты нысандарымен үздіксіз радиобайланыс орнату мүмкіндігі.
Газ бақылауы: Атмосферадағы газдардың мөлшерін қадағалайтын аэрогазды бақылау жүйесі.
Сондай-ақ, ТЖМ өкілдері кеншілердің денсаулығын қадағалайтын АСМО медициналық тексеру бөлмесін және шахта музейін аралады.
Тексеріс кезінде Ерболат Садырбаев пен Кеңгірбай Есенеев шахтаның +110 горизонтындағы 47К1-з лавасына түсіп, кәсіпорынның нақты жұмыс жағдайын бағалады. Сапар соңында кәсіпорын басшылығымен арнайы кеңес өткізілді.
«Кеңес қорытындысы бойынша кәсіпорындағы өнеркәсіптік қауіпсіздік жағдайын жақсарту бойынша нақты шаралар мен ұсыныстар берілді», — деп хабарлады ҚР ТЖМ баспасөз қызметі.
Бұл тексеріс стратегиялық нысандардағы қауіпсіздікті нығайту және қайғылы оқиғалардың алдын алу мақсатында жүргізіліп отыр.