Жағдай Қазақстан үкіметінің ерекше бақылауында болады
Энергетика министрлігі Новороссийск портындағы Каспий құбыр консорциумы теңіз терминалындағы төтенше жағдайға байланысты ресми түсініктеме берді, деп хабарлайды Azattyq Rýhy.
Ведомствоның мәліметінше 29 қарашада Астана уақыты бойынша сағат 06:06-да Каспий құбыр консорциумы (КҚК) теңіз инфрақұрылымының нысандары Новороссийск қаласы маңында экипажсыз жүзу құралдарының шабуылына ұшырады.
Шабуыл салдарынан екінші сыртқы аялдау құрылғысы айтарлықтай зақымданды. Кешен толық жөндеу-қалпына келтіру жұмыстары жүргізілгенге дейін істен шығарылды.
Энергетика министрлігі азаматтық маңызы бар инфрақұрылым нысандарына бағытталған мұндай әрекеттерге жол берілмеуге тиіс екенін ерекше атап өтті.
«КҚК жүйесі – халықаралық энергетикалық жоба және оның нысандарына кез келген күш қолдану жаһандық энергетикалық қауіпсіздікке тікелей қауіп төндіреді, сондай-ақ консорциум қатысушыларының, соның ішінде Қазақстан Республикасының экономикалық мүдделеріне елеулі зиян келтіреді», - деп жазылған хабарламада.
Теріс салдарды азайту және ірі кен орындарындағы өндіріс қарқынын сақтау мақсатында министрлік экспорттық көлемдерді балама бағыттарға қайта бағыттау бойынша жедел жоспарды іске қосты.
Жағдай Қазақстан үкіметінің ерекше бақылауында болады.