Қызмет қымбаттап жатса да, сұраныс төмендемеген
Қазақстанда сұлулық салондарының қызметі қымбаттап жатса да, сұраныс төмендеген жоқ. Ұлттық статистика бюросының дерегінше, биыл алғашқы алты айда қазақстандықтар шаштараз және басқа да сұлулық қызметтеріне 57 млрд теңгеге жуық қаржы жұмсаған. Бұл — өткен жылмен салыстырғанда 73% көп, деп хабарлайды Azattyq Rýhy.
Статистикаға сүйенсек, бір жыл ішінде шаш қию бағасы 15,5% қымбаттаған. Соған қарамастан, сұлулық салондарына баратындар саны азаймаған.
Әйелдерге арналған шаштараз қызметтері ең қымбат өңір — Алматы. Мұнда орта есеппен шамамен 7 000 теңге береді.
Астана мен Ақтауда баға 5 000 теңге шамасында.
Ал ең арзан өңірлер Түркістан мен Семей.
Бұл қалаларда әйелдердің шаш қиюы орташа 2 700 теңге тұрады.
Ерлердің шаш қиюы әйелдерге қарағанда біршама қолжетімді.
Ең жоғары баға Алматы, Қарағанды қалаларында. Онда ерлердің шаш қибы орта есеппен 4 000 теңге.
Ал арзан өңірлер Ақтөбе, Қызылорда. Мұнда қызмет құны 2 000 теңге шамасында.
Сұлулық қызметтерінің бағасы өссе де, нарықтағы сұраныс айтарлықтай жоғары екені байқалады. Негізгі шығынды ірі мегаполистер тұрғындары құрап отыр, ал өңірлердегі баға айырмашылығы бірнеше есеге дейін жетеді.