Әскери техника жолға шығады
Қазақстан Қорғаныс министрлігі желтоқсан айының басында ел аумағында әскери техниканың қозғалуы туралы азаматтарға ескерту жасады. Бұл қозғалыс жаңа оқу жылының басталуына байланысты әскери бөлімшелерді жоғары жауынгерлік әзірлікке келтіру жаттығуларымен байланысты, деп хабарлайды Azattyq Rýhy.
Қорғаныс министрлігінің мәліметінше, 2025 жылдың желтоқсан айының алғашқы күндерінде Қарулы Күштердің барлық бөлімшесі оқу сигналы бойынша жауынгерлік әзірліктің жоғары дәрежесіне келтіріледі.
Бұл шаралар жаңа оқу жылының басталуына орай жасалып отыр.
Жауынгерлік әзірлікке келтірілгеннен кейін, әскери бөлімшелер жоспарлы марштар жасап, оқу полигондарына және оқу орталықтарына бет алады.
Жекелеген әскери бөлімдер жауынгерлік әзірлік бойынша кешенді сабақтар өткізілетін орындарға әуе, теміржол және автомобиль көліктерімен жеткізіледі.
Қорғаныс ведомствосы аталған кезеңде қауіпсіздікті қамтамасыз ету мақсатында өңірлердегі жекелеген жол учаскелерінде жол қозғалысына уақытша шектеулер енгізілуі мүмкін екенін ескертеді. Қорғаныс министрлігі азаматтар мен бұқаралық ақпарат құралдарының өкілдерінен тек ресми ақпарат көздеріне сүйенуді және тексерілмеген ақпаратты таратпауды сұрайды. Бұл – қоғамдық тыныштықты сақтау үшін аса маңызды.