Тұтынушылардың құқықтарын қорғау комитеті түсініктеме берді
Шығыс Қазақстан облысында тұрғын үйдің бұрынғы иесінің қарызына байланысты қызмет көрсетуге келісімшарт жасасудан бас тартқан домофон компаниясына қатысты шағым түсті, деп хабарлайды Azattyq Rýhy.
Тұтынушылардың құқықтарын қорғау комитеті пәтерді сатып алған кезде коммуналдық қызметтерді төлеу Қазақстан Республикасы Азаматтық кодексінің 189-бабына және 238-бабына сәйкес, жаңа иесінің атына меншік құқығын мемлекеттік тіркеу сәтінен бастап жүргізілетінін еске салды.
Осы сәттен бастап сатып алушы ресми түрде меншік иесі болып, мүлікті ұстау ауыртпалығын өзіне қабылдайды. Осы күнге дейін коммуналдық қызметтер бойынша қарыздар үшін жауапкершілікті бұрынғы меншік иесі (сатушы мен сатып алушы арасында арнайы келісіммен өзгеше көзделмесе) көтереді.
Департамент домофон компаниясына қатысты жоспардан тыс тексеру жүргізді. Тексеруге негіз болған – тұтынушының «Қазпочта» АҚ арқылы жіберген наразылығына жауап бермеуі.
«Қазақстан Республикасының «Тұтынушылардың құқықтарын қорғау туралы» Заңының 42-4-бабының 2-тармағына сәйкес, сатушы (дайындаушы, орындаушы) тұтынушының наразылығын қарауға және тұтынушының талаптарымен келіспеген жағдайда, наразылықты алған күннен бастап он күнтізбелік күн ішінде құжатпен негізделген, дәлелді жазбаша жауап беруге міндетті. Бұл құжаттардың көшірмелері сатушының (дайындаушының, орындаушының) тұтынушыға берген жауабына қоса берілуге тиіс.
Жоспардан тыс тексеру қорытындысы бойынша домофон компаниясы Қазақстан Республикасының тұтынушылардың құқықтарын қорғау туралы заңнамасын бұзғаны үшін айыппұл түрінде әкімшілік жауапкершілікке тартылды. Сондай-ақ, бұзушылықтарды жою туралы нұсқама берілді. Қабылданған шаралардың нәтижесінде домофон компаниясы тұтынушының шағымда баяндалған мән-жайлар бойынша жауап берді», – делінген комитет хабарламасында.
Департамент ескертеді: тұтынушылардың құқықтарын сақтамау әкімшілік және азаматтық-құқықтық жауапкершілікке әкеп соғады, оның ішінде айыппұлдар да бар, олардың мөлшері бизнес санатына (жеке тұлға, шағын, орта немесе ірі) және бұзушылық сипатына байланысты болады.