Нәтижесінде сұлулық салоны төленген ақысын ғана қайтарып берген
Ақтауда кәмелетке толмаған баланың шашына косметологиялық процедурадан кейін елеулі зиян келгені анықталды, деп хабарлайды Azattyq Rýhy.
Тұтынушылардың құқықтарын қорғау комитетінің мәліметінше, Ақтауда әйел адам косметологиялық қызметтің салдарынан баласына ауыр зиян келгенін мәлімдеді. Оның айтуынша, қаладағы сұлулық салондарының бірінде балаға био-түзету жасалғаннан кейін шашы жаппай түсе бастаған.
Әйел адамның айтуынша, қызмет көрсетілмес бұрын маман алдын ала кеңес беріп, 15 000 теңге көлемінде төлем алған. Алайда процедурадан кейін-ақ баланың шашы түсе бастап, бас терісі күйіп қалған. Бала физикалық қана емес, психологиялық күйзеліске ұшыраған.
Анасы мән-жайды анықтау үшін шеберге жүгінгенімен, мардымды жауап ала алмаған. Оның сөзінше, косметолог «баланың өзі үйге бара жатқанда шашын бүлдіргенін» айтып, келтірілген шығынды өтеуден бас тартқан.
Оқиға орнына учаскелік инспектор шақырылып, факті тіркелген. Ата-аналар Маңғыстау облысының Сауда және тұтынушылардың құқықтарын қорғау департаментіне де шағым жолдаған.
Тексеру нәтижесінде департамент мамандары тұтынушының пайдасына шешім шығарды. Нәтижесінде отбасы көрсетілген қызметтің толық құнын – 15 000 теңгені қайтарып алды.