Қазақстанда азық-түлік арзандап жатыр: қай өнімдердің бағасы төмендеді

Қазақстанда әлеуметтік маңызы бар бірқатар азық-түлік тауарларының бағасы төмендеді. 2026 жылғы 15 шілдедегі мәлімет бойынша, соңғы есепті аптада көкөніс, жұмыртқа, ұн және тауық еті арзандаған, деп хабарлайды Azattyq Rýhy Ұлттық статистика бюросына сілтеме жасап.

Бағасы ең көп төмендеген өнім – қияр. Соңғы бір аптада оның құны бірден 4,6%-ға арзандаған. Сондай-ақ қызанақ пен сәбіздің бағасы 3,2%-ға, жұмыртқа 0,4%-ға, ұн 0,3%-ға, ал тауық еті 0,2%-ға төмендеген.

Өңірлер бойынша алғанда, әлеуметтік маңызы бар азық-түлік тауарларының бағасы бірнеше қалада арзандаған. Ең жоғары төмендеу Ақтауда тіркелді – 0,7%. Сондай-ақ Қонаевта баға 0,3%-ға, Жезқазған мен Петропавлда 0,2%-ға, Тараз, Қарағанды және Түркістанда 0,1%-ға төмендеген.

Ал Астана, Шымкент, Қызылорда, Өскемен, Павлодар және Семей қалаларында әлеуметтік маңызы бар азық-түлік бағасы бір апта ішінде өзгеріссіз қалған.

Қазақстан бойынша қиярдың орташа бағасы бір келісі үшін 524 теңгені құрады. Ең төмен баға Тараз қаласында тіркелген – бір келісі 357 теңге.

Ел бойынша жылтыратылған күріштің орташа бағасы бір келісі үшін 534 теңгеге жетті. Бұл өнім ең арзан Қызылордада – 456 теңгеден, сондай-ақ Алматыда – 478 теңгеден сатылып жатыр.

Ақ қауданды қырыққабаттың орташа бағасы бір келісі үшін 198 теңгені құрады. Ең төмен баға Түркістанда тіркелген. Онда көкөністің бір келісі орта есеппен 137 теңгеден сатылуда.

Елімізде бірінші санаттағы он жұмыртқаның орташа бағасы 561 теңгеге жетті. Ең қолжетімді баға Қызылордада тіркелген – он данасы 464 теңге. Одан кейінгі ең төмен баға Оралда – 476 теңге.

Әлеуметтік маңызы бар азық-түлік тауарлары бағасының индексі апта сайын есептеледі. Баға мониторингі барлық облыс орталықтарында, республикалық маңызы бар қалаларда және елордада жүргізіледі.