«Қыздар бір-бірінің шашын жұлады»: Зәкиева Жамбыл облысының мектептеріндегі сұмдық жайттарды айтты

Жамбыл облысындағы мектептерде әлімжеттік көрсету оқушылардың күнделікті ісіне айналып кеткен. Жасөспірімдер электрошокер, кастет ұстап жүреді, қатарластарын бопсалайды, ұрып-соғады. Бұл туралы мәліметті Бала құқықтары жөніндегі уәкіл Динара Зәкиева жария етті.

Уәкіл жақында мемлекеттік органдармен бірлесіп балалардың құқығының бұзылуы, зорлық-зомбылық, буллинг, суицид және кәмелетке толмағандар арасындағы қылмыстың алдын алу бойынша зерттеу жүргізген, деп хабарлайды Azattyq Rýhy.

«Шу ауданындағы мектептерде қыздар сексуалдық зорлық-зомбылыққа тап боламын деген қорқынышпен өмір сүреді. Қордай ауданындағы 5, 7, 9-сынып оқушыларының айтуынша, жоғары сыныптың оқушылары оларға тамақ, сусын алғызады. Тас лақтырып, соққыға алатынын, қыздардың бір-бір бірінің шашын жұлатынын айтты. Кейбір мектептерде оқушылар мұғалімдердің қол көтеретінін, зат лақтыратынын, буллинг жасайтынын да атап көрсеткен», -деді уәкіл.

Динара Зәкиеваның айтуынша, қыркүйекте Тараздағы мектептердің дәретханасында бала қайтыс болған, ал өткен жылы психологтар жүргізген диагностикада балалар бопсалау мен буллинг туралы хабарлағанымен, шаралар қабылданбаған.

«Сол сияқты 11-сынып оқушыларының 9-сынып оқушыларын бопсалауы, ұруы, мұғалімдер тарапынан буллинг көруі, оқушылардың психологиялық жағдайының нашарлауы басқа мектептерде де байқалады», - деді уәкіл.

Сонымен қатар, уәкілдің айтуынша, осы жылдың 9 айында облыста 14 бала суицид жасаған, оның жетеуін құтқарып қалуға болатын еді.