Норвегияда қазақстандық сарбаздарды еске алды

Қазақстанның Норвегиядағы елшілігі өкілдері мен басқа да белгілі қайраткерлер Йорстадмоен әскери зиратындағы Кеңес жауынгері монументіне гүл шоқтарын қою рәсіміне қатысты, деп хабарлайды Сыртқы істер министрлігі.

Белгілі болғандай, Қазақстан елшілігінің атсалысуымен Ұлы Отан соғысы кезінде Норвегия аумағында 44 қазақстандық сарбаз жерленгені анықталды. Оның бесеуі Лиллехаммер шетінде орналасқан Йорстадмоен әскери зиратында жерленген.

«Қазақстан елшісі өз сөзінде қазақ халқы 75 жылдан бері алғаш рет алыс Норвегияда аты-жөндері жуырда ғана анықталған жерлестерімізге бас июге мүмкіншілік туғанын атап өтті. Ұзақ жылдар бойы олардың тағдыры белгісіз болды. Біздің қасиетті парызымыз – алдағы уақытта осында жатқан сарбаздарды есте сақтау», - деді делінген хабарламада.

Қазақстанның Ослодағы елшілігі соғыс кезінде Норвегияда жерленген қазақстандық жауынгерлердің аты-жөнін анықтау жұмысын жалғастыруда.

Екінші дүниежүзілік соғыс кезінде оккупацияланған Норвегиядағы концлагерлерде 100 мыңға жуық кеңестік әскери тұтқындары болған. Олардың 15,5 мыңға жуығы қамауда қаза тапты. Оккупациялық билік қайтыс болған тұтқындардың көбін лагерлердің айналасына жерлей берген.

1942 жылдың сәуірінен 1945 жылдың мамырына дейін Йорстадмоенда 954 тұтқын жерленген. Марқұмдардың көбі кеңестік әскери тұтқындары болатын.