Жалынның тұрғын үйге және көршілес құрылыстарға таралу қаупі болды
Қостанайда монша өртеніп, өрттің тұрғын үйге таралу қаупі төнді. Құтқарушылар дер кезінде әрекет етіп, газ және оттегі баллондарын сыртқа шығарып, жарылыстың алдын алды, деп хабарлайды Azattyq Rýhy.
Төтенше жағдай Қостанай қаласының Бородина көшесінде болды. Хабарлама «101» пультіне түскеннен кейін оқиға орнына жедел жеткен өрт сөндірушілер ғимаратты тексеріп, өртті сөндіруге кірісті.
Өрт шаруашылық нысан мен баняның төбесін шарпыған. Жағдайды қиындатқан жайт – жалынның тұрғын үйге және көршілес құрылыстарға таралу қаупі болды.
Өртті сөндіру кезінде құтқарушылар түтін басқан бөлмеден оттегі және газ баллондарын алып шықты. Бұл – ықтимал жарылыстың алдын алды.
«Жедел әрі үйлесімді әрекеттің арқасында жалынның таралуына жол берілмей, тұрғын үй аман сақталды», – деп хабарлады ТЖМ.
Оқиға куәгерлері құтқарушыларға ризашылығын білдірді.
«Өрт сөндірушілер уақытылы келіп, көршіміздің үйін сақтап қалды», – деп көршілердің білдірген алғысы ТЖМ-ның ресми арнасында жарияланды.