«Жағдайы ауыр»: Шымкентте пойыздың үстіне шығып, селфи жасағысы келген 11 жасар баланы тоқ соғып алды (ВИДЕО)

Шымкенттегі теміржолдың бойында тұрған жүк көлігінің үстіне шығып, селфи жасағысы келген 11 жастағы баланы тоқ соғып, ауруханаға түсті, деп хабарлайды Azattyq Rýhy.

«Отырар» телеарнасының мәліметіне сүйенсек, бала әуел баста теміржолдың бойында ойнап жүрген. Кейін сатымен жүк көлігінің үстіне шығып, селфи жасағысы келген.

«11 жастағы бала станцияда тұрған жүк пойызының үстіне шығып, оны қатты тоқ соғып алды. Ең өкініштісі, бұл қайталанып тұратын жағдай. Біз өңірлерді аралап бұның қандай қауіпті екенін ескертіп, түсіндіреміз», - дейді филиалдың қауіпсіздік жөніндегі атқарушы директоры Серік Айқынбеков.

«Отырар» телеарнасы хабарлағандай, Шымкент қаласының денсаулық сақтау басқармасы баланың жағдайы туралы ақпарат бермеген. Бұған оның ата-анасы қарсы болыпты. Дегенмен, дереккөзге сүйенген телеарна баланың денесі 80 пайызға күйген дейді.