Оқиға 17 шілде күні ауруханада болған
Қостанайда облыстық аурухананың дәрігерін соққыға жыққан 34 жастағы ер адам екі айға қамауға алынды. Бұл туралы облыстық полиция департаменті мәлімдеді, деп хабарлайды Azattyq Rýhy.
Жанжал Қостанай облыстық ауруханасында 17 шілде күні болған. Ер адам отадан кейін науқастарға шыққан уролог-дәрігер Антон Кистановқа шабуылдаған. Куәгерлердің айтуынша, күдікті ұзақ күтуге шыдамай ашуланған.
Оқиға орнында ұсталған күдіктіге қатысты «Денсаулыққа қасақана ауыр зиян келтіру» бабы (ҚР ҚК 106-бабы) бойынша іс қозғалды. Сот оны екі ай мерзімге тергеу изоляторына қамаутуралы шешім шығарды.
Қостанай облыстық Полиция департаментінің мәліметінше, қазіргі уақытта тергеу амалдары жүргізіліп жатыр.
«Қажетті барлық тергеу әрекеттері атқарылуда», – деп хабарлады ведомство өкілдері.
Бұл оқиға қоғамда резонанс туғызды. Желі қолданушылары дәрігерлердің қауіпсіздігін қамтамасыз ету қажет екенін айтып, пікір қалдыруда. Медициналық қызметкерлерге қол көтеру – тек қана заң алдында емес, қоғам алдында да жауапкершілікті талап ететін ауыр қылмыс екені атап өтілді.