«Сот оны ақтап шықты»: күйеуінен оңбай таяқ жеген әйел әділдік іздеп, Тоқаевқа үндеу жасады (ВИДЕО)

Павлодарлық Олеся есімді келіншек күйеуінен тұрмыстық зорлық-зомбылық көрген. Алайда оның агрессор күйеуін сот ақтап шыққан. Бұл әділетсіздікке төзбеген ол ел президенті Қасым-Жомарт Тоқаевтың атына үндеу жолдады, деп жазады Azattyq Rýhy.

«Сізге Қазақстан халқының атынан сайланған мемлекет басшысы ретінде соңғы үмітпен жүгініп отырмын. Менің атым – Олеся. 2024 жылдың желтоқсан айында күйеуім тарапынан аяусыз соққыға жығылдым. Бірнеше күннен кейін ғана маған үйден қашып шығып, полицияға жүгінуге мүмкіндік туды. Мен құқық қорғау органдарына арыз жазып, денсаулыққа келтірілген зиян мен қоқан-лоқы, өміріме төнген қауіп туралы бар дәлелдерді ұсындым. Алайда бұл қылмыстық іс шамамен жарты жыл тергеліп, нәтижесінде сот ақтау үкімін шығарды. Сот шешімі процессуалдық бұзушылықтарға сілтеме жасай отырып қабылданған. Бірақ менің бұл заңбұзушылықтарға ешқандай қатысым жоқ», - дейді жәбірленуші.

Ол елде қабылданған заңдарда отбасылық зорлық-зомбылық жасаған тұлғаларға қатаң жаза қарастырылғанын айтты.

«Алайда Павлодар облысының соттары мұндай деректерге көз жұмып, нақты дәлелдерге қарамастан осындай ақтау үкімін шығарып отыр. Менің қолымда сот-медициналық сараптама қорытындылары, дене жарақаттарының фотосуреттері, бейнематериалдар, өміріме қауіп төндірілген сәттер сынды дәлелдер бар. Егер менімен бірдеңе болып қалса, менің өліміме кім жауап береді? Тергеуші ме? Судья ма? Әлде прокурор ма? Мен Павлодар облысындағы құқықтық жүйеге сенуден қалдым. Сондықтан сізге барша Қазақстан әйелдерінің атынан жүгінемін. Егер мұндай жағдайда қалған әйелге әділет табылмаса, онда біздің елімізде зорлық-зомбылық құрбандарына ешқандай қорған жоқ деген сөз», - деді ол.

Бұл үндеуге қатысты Павлодар қаласының прокуратурасы да жауап берген.

Прокуратура соттың ақтау үкіміне қатысты апелляциялық шағым дайындағанын хабарлады.

«Прокуратура сот шешімінің күшін жоюды және сотталушыны кінәлі деп танып, жасаған құқықбұзушылықтың санкциясына сай жаза тағайындауды сұрап отыр. Қылмыстық іс материалдары бойынша апелляциялық сатыда қарау жалғасып жатыр», - деп жазды олар.