Атақты актер Брэд Питтің үйін ұрылар тонап кетті

Автор: Темірхан Айжан

Кейінгі кезде жұлдыздардың үйіне жиі ұры түсетін болған 

Фото: Joel C. Ryan/Invision/AP

Әлемге әйгілі актер Брэд Питтің Лос-Анджелестегі үйін ұрылар тонап кеткен, деп хабарлайды Azattyq Rýhy. CBS news-ке сілтеме жасап.  

Бұзақылар күндіз үйде ешкім жоғын пайдаланып, терезені сындырып кірген. Полицияның мәлімдеуінше, ұрылар үйді тінтіп, әртүрлі мүлікті алып кеткен. Заттардың құны жарияланбады.

Сақшылар 3 күдіктіні іздестіріп жатыр.

Соңғы жылдары Лос-Анджелес пен Оңтүстік Калифорнияның элиталық аудандарында баукеспелер көбейген. Олар VIP-тұлғалар мен танымал жұлдыздардың баспанасын тонап жүр.

Өткен қыста Оңтүстік Калифорнияда әлем чемпионы, «Лос-Анджелес» футбол клубының жұлдызы Оливье Жирудың үйінен көп көлемде зергерлік бұйым ұрланған. Бір апта өткен соң Әулие Валентин күнінде Лос-Анджелесте актриса Николь Кидман мен музыкант Кит Урбанның үйіне ұры түсті.