Жаңаөзенде түлектер мінген көлік апатқа түсті (ВИДЕО)

Бүгін, 23 мамырда Жаңаөзенде мектеп бітіруші түлектер мінген Lexus LX 450 көлігі жол апатына ұшырады, деп хабарлайды Azattyq Rýhy.

Апат кезінде Toyota Hilux, Toyota Land Cruiser 100 және Lexus LX 450 көліктері соқтығысқан.

Жол апатының видеосы желіде тарады

Әлеуметтік желіде тараған видеода ашық жүксалғышы бар Toyota Hilux пикапы жоғары жылдамдықпен жол жиегімен жүріп, көліктерді айналып өтпек болғанда, түлектер отырған джипке соғылғаны анық көрінеді. Апат орнында бір топ адам жиналып, мектеп формасын киген балалардың көліктен түсіп жатқаны байқалады.

Полиция апаттың мән-жайын түсіндірді

«Toyota Hilux атты ашық жүксалғышы бар жеңіл көліктің жүргізушісі алда кетіп бара жатқан Land Cruiser 100 көлігін басып озуға әрекет жасаған. Алайда маневр жасау кезінде Toyota Hilux жол жиегіне сәтсіз шығып кетіп, Land Cruiser 100 көлігімен соқтығысқан, салдарынан Land Cruiser 100 инерциямен Lexus LX 450 көлігіне соғылған. Нәтижесінде ашық жүксалғышы бар жеңіл көлік жолдан ұшып кеткен», - деп хабарлады полиция.

Зардап шеккендер жоқ

Оқиға салдарынан ешкім зардап шеккен жоқ. Toyota Hilux жүргізушісіне қатысты ҚР ӘҚБтК-нің 610-бабы бойынша әкімшілік хаттама толтырылды. Автокөлік айыптұраққа қойылды.

Түлектер тек Lexus LX 450 көлігінде болған

Полицияның мәліметінше, апат кезінде түлектер тек Lexus LX 450 көлігінде отырған. Бұл көліктің соқтығысуы салдарынан балалардың жағдайы қоғамда алаңдаушылық тудырды.