Сондай-ақ, 50 мыңнан астам алкоголь өнімі бар жүк вагонының жолы кесілді
ШҚО-да жалған марка жабыстырылған 100 мың шөлмек алкоголь өнімі тәркіленді, деп жазады altaynews.kz. Бұл туралы Экономикалық тергеу департаментінің баспасөз қызметі хабарлады.
ҚР ҚМ Қаржы мониторингі комитетінің ШҚО бойынша Экономикалық тергеу департаментінің қызметкерлері жеке фирмалардың бірінің қоймасынан жалған акциздік маркалар жабыстырылған алкоголь өнімін заңсыз сату және сақтау фактісінің жолын кесті.
Табылған 100 мың шөлмектің жартысы Алтай ауданында жеке кәсіпкердің қоймасында дайындалған.
«Құрамын тексерген мамандар да арақ сапасының өте төмен екенін айтып отыр. Оның үстіне, санитарлық талап сақталмаған жерде дайындалған. Сондықтан тұтынуға қауіпті болып шықты. Ал қоймаға дер кезінде келген тексеру жұмыстарының арқасында, қала дүкендеріне таратылғалы жатқан 50 мың шөлмек арақ тәркіленді», - делінген хабарламада.
Сондай-ақ, тиісті ілеспе құжаттарсыз дәл сол жеке кәсіпкердің атына жіберілген 50 мыңнан астам алкоголь өнімі бар жүк вагонының жолы кесілді.
Енді заңсыз тауардың көзі жойылып, қойма иелері қылмыстық жауапқа тартылатын болады.
Аталмыш факті бойынша ҚР ҚК 233-бабы, 2-бөлігі бойынша сотқа дейінгі тергеу жұмыстары басталады.