«Қызды қылмыскерден құтқарып қалған»: семейлік полицей жол апатынан қаза тапты
Қайтыс болған полицей наурыз айында қызды қылмыскерден арашалаймын деп пышақ жарақатын алған еді
Абай облысында жол апатынан полиция қызметкері мерт болды, деп хабарлайды Azattyq Rýhy.
Абай облыстық ПД баспасөз қызметінің мәліметінше, жол апаты бүгін «Омбы-Майқапшағай» тасжолында орын алған.
Үш көліктің қатысуымен болған жол апатының видеосы әлеуметтік желіде тарады.
Полиция аталған факті бойынша сотқа дейінгі тергеу басталғанын мәлім етті.
«2024 жылғы 18 қазанда «Омбы — Майқапшағай» автожолында үш көлік құралының қатысуымен жол-көлік оқиғасы болды. Соқтығысу нәтижесінде үш азамат, оның ішінде Семей қаласының полиция аға сержанты Ахатов Асхат қаза тапты. Осы факті бойынша сотқа дейінгі тергеу басталды. Барлық жағдайлар анықталады», - делінген ПД хабарламасында.
Полиция департаменті қаза тапқандардың туыстары мен жақындарына көңіл айтады.
Естеріңізге сала кетейік, қайтыс болған полиция қызметкері осы жылдың наурыз айында қызды қылмыскерден арашалаймын деп пышақ жарақатын алған болатын.
