Ақтөбе облысында тағы да жол апаты: 2 адам мерт болды

Ақтөбе облысында тағы да жол апаты тіркелді, салдарынан 2 адам опат болды, деп хабарлайды Azattyq Rýhy.

Қайғылы оқиға Бекқұл Баба ауылына жақын жерде болған. Toyota Ipsum минивэны мен жүк көлігі соғысқан. Минивэннің жүргізушісі мен жолаушысы оқиға орнында көз жұмды. Тағы үш адам жарақат алып ауруханаға түсті.

«DAF маркалы көлік жүргізушісі Хромтаудан Ақтөбеге жол тартқан. «Батыс Жер» кемпингінің жанында ол Toyota Ipsum-ға соғысқан. Минивэн жүргізушісі мен жолаушысы сол жерде қаза тапты. Сотқа дейінгі тергеу басталды», - деп хабарлады Ақтөбе облысы ПД.

Айта кетерлігі, аймақта бір күнде екі жол апаты тіркелді. Екеуінде де жүк көлігі мен Toyota Ipsum соғысты. 7 тамызда Самара-Шымкент тас жолында жан түршігерлік қақтығыстан 8 адам мерт болды. Оқушылар ата-аналарымен бірге спорттық жарысқа бара жатқан.