Нигерияда тырысқақтан өлгендер саны 156 адамға жетті
Сырқат адамдар саны 5 мыңға жуықтаған
Нигерияның індеттерді бақылауға алу мен оның алдын алу орталығының (NCDC) мәліметтері бойынша, 15-21 шілде аралығында елде 170 адам тырысқақ инфекциясын жұқтырған, 3 адам көз жұмған, деп хабарлайды Azattyq Rýhy.
Анадолы агенттігінің хабарлауынша, биылғы жылдың қаңтар айынан бері есептегенде індеттен қырылғандар саны 156-ға жеткен.
Бүкіл ел бойынша тырысқақ жұқтырған 4809 адам тіркелді. Бұл дертті «Вибрион» бактериялары таратады. Ол тамақ пен су арқылы жұғады. Ауру адамның іші өтіп, ағзадағы су азайып, құрғайды. Ем шаралары уақытылы жүргізілмесе, арты өлімге әкеледі.
Нигерия таза судың жетіспеушілігімен қатар, қажетті медициналық көмекке де зәру ел. Мұнда безгек, полиомиелит, сүзек және маймыл шешегі вирусын жұқтыру қаупі жоғары.
