Іздеу жұмыстарына 93 адам және 4 техника жұмылдырылды
Түркістан облысында 5 жасар қыз суару каналына батып кетті. Бұл туралы Түркістан облысы ТЖД қоғаммен байланыс тобы мәлім етті, деп хабарлайды Azattyq Rýhy.
ТЖД мәліметінше, оқиға Сарыағаш ауданына қарасты Біртілек ауылында болған.
5 жасар бүлдіршін 16 наурыз күні түскі уақытта үйден шығып кетіп, қайтып оралмаған.
Куәгерлер суару каналынан аяқ киімін көргенін айтты. Іздеу жұмыстарына төтенше жағдай департаменті мен жергілікті атқарушы органдардан және полиция қызметінен 93 адам және 4 техника жұмылдырылды.
«Іздеу тобы жоғалған қыздың денесін үйден 2 шақырым жердегі каналдан тауып, судан шығарып алды», - делінген ақпаратта.