Қарағанды облысында жоғалып кеткен екеудің денесі өзеннен табылды

Қарағанды облысында жоғалып кеткен ер адам мен әйел адамның денесі Нұра өзенінен табылды, деп хабарлайды Azattyq Ruhy.

Облыстық Төтенше жағдайлар департаменті хабарлағандай, 18 маусымда сағат 21:50-де Абай ауданы Самарқа ауылының маңында 1986 жылы туған әйел адам мен 1987 жылы туған ер адамның жоғалып кеткені туралы хабарлама келіп түскен.

«Іздестіру-құтқару жұмыстарын жүргізу үшін Қарағанды облысының ТЖД күштері жұмылдырылды. 19 маусымда сағат 15:25-те із-түзсіз жоғалған әйелдің денесін ТЖД-нің сүңгуірлері Нұра өзенінен тапты. Жоғалған екінші адамның денесі 20 маусымда сағат 16:05-те іздеу жұмыстары басталған жерден 3,5 шақырым жерде Нұра өзенінен табылды», - делінген хабарламада.

Қазіргі кезде өлімнің мән-жайы анықталып жатыр.

Шомылу кезеңінде қайғылы жағдайдың алдын алу үшін суда өзін-өзі ұстау ережелерін сақтаңыз:

• жүзуді білмесеңіз, белден жоғары суға түспеңіз;
• балаларды қараусыз қалдырмаңыз;
• мас күйде суға түспеңіз;
• таныс емес жерлерде суға түспеңіз;
• жағадан алыс жүзбеңіз;
• түнде суға түспеңіз.