Сотталғандардың университеттің 9 га жер учаскесін сатып жібергені дәлелденді
Қазақ Ұлттық қыздар педагогикалық университетінің бұрынғы ректоры 7 жылға сотталды, деп хабарлады Azattyq Ruhy Сыбайлас жемқорлыққа қарсы іс-қимыл агенттігінің баспасөз қызметіне сілтеме жасап.
«Қарасай аудандық сотының үкімімен бұрынғы ректор – «Қазақ Ұлттық қыздар педагогикалық университетінің» КЕАҚ Басқарма Төрағасы Г.Алдамбергенова, ректордың кеңесшісі Қ. Қожантаев (Алдамбергенованың туған ағасы) және «Азаматтарға арналған үкімет «Мемлекеттік корпорациясы» КЕАҚ филиалының Қарасай Жер кадастры және жылжымайтын мүлік бөлімінің басшысы А. Журунов кінәлі деп танылып, 7 жылға бас бостандығынан айырылды.
Сол үкіммен Қарасай бөлімі басшысының орынбасары Д. Жұмаділ мен бөлім маманы Е. Кемал шартты түрде 7 жылға бас бостандығынан айырылды», - делінген ведомство хабарламасында.
Барлық сотталғандарға мемлекеттік қызметте қызмет атқару құқығынан өмір бойына айыру түріндегі жаза қолданылды.
«Тергеу барысында сотталғандардың бөгде тұлғаларға заңсыз ресімделгені, университеттің 9 га жер учаскесін бөліп және адал сатып алушыларға сатқаны дәлелденді. Нәтижесінде университетке 95,5 миллион теңге шығын келтірілді», - делінген хабарламада.
Үкім заңды күшіне енген жоқ.