Шымкентте төрт айлық сәби шеге жұтып қойды
Қалалық балалар клиникалық ауруханасының дәрігерлері сәбидің асқазанынан темір шегелерді алып шықты
Шымкентте дәрігерлер шеге жұтып қойған төрт айлық сәбидің өмірін аман алып қалды, - деп хабарлайды Azattyq Rýhy тілшісі қалалық денсаулық сақтау басқармасына сілтеме жасап.
Дәрігерлердің айтуынша, сәбидің ата-анасы баланың буындары ауырып жатыр деп ақ халаттылардың көмегіне жүгінген.
«Алайда ортопед дәрігер рентген суретінен баланың асқазан-ішек жолдарында тұрған темір затты көрген. Және сәбиге жедел түрде операция жасалды. Себебі, шегелер асқазан-ішек жолдарына зақым келтіруі мүмкін еді», - дейді Денсаулық сақтау басқармасындағылар.
Сәтті өткен операциядан соң баланың беті бері қарап, бір аптадан соң үйіне шығарылды.
Отаны Қалалық балалар ауруханасының білікті дәрігерлері – Сарыбай Сұлтанғали, Жақсылық Амантаев және Асанбай Құрманәлиев жасаған.
Баланың ата-анасының айтуынша, ол шегемен ойнап отырып байқаусызда жұтып қойған. Қазір төрт айлық сәбидің өміріне қауіп төніп тұрған жоқ.
