Алматыда әскерге сау кеткен сарбаз жарты жылдан соң жүйке ауруына шалдығып оралды

Azattyq Rýhy

Ордабек Түймебаевт әке-шешесі Нұр-Cұлтан қаласындағы психитариялық ауруханаға жатқызуға мәжбүр болған

Әскерден мерзімінен бұрын үйіне оралған Ордабек Түймебаевты әке-шешесі алты айдан соң психитарияға жатқызған. Бұл аралықта жас жігіттің мінезі өзгеріп, жеке заттарын жоғалтып, үйдегі дүниелерді өртейтін әдет шығарған, деп хабарлайды Azattyq Rýhy тілшісі 31 арнаның Информбюро бағдарламасына сілтеме жасап.

Ордабектің әкесі Алмахан Балықбаевтың түсіндіруінше, ұлы өткен жылы қараша айында Алматыдағы 7552 әскери бөліміне аттанғанда денсаулығында еш кінәрат болмапты. Алайда жарты жылдан соң оны әскери қызметтен мерзімінен бұрын босатып, үйіне әкеліп тастаған. Біраз уақыт өткенде Ордабектің мінез-құлқы құбыла бастапты.

«Балам оқта-текте «Ақша сұраумен болды, ақша болмаса, төрт-бесеу болып тепкілейді» деп айтып қалатын», – дейді Алмахан Балықбаев.

Ұлының жағдайы күн өткен сайын ушыға түскен соң, әке-шешесі Нұр-Cұлтан қаласындағы психитариялық ауруханаға жатқызуға мәжбүр болған. Қазір ол он күннен бері осында ем алып жатыр.

Ұлттық ұлан «Оңтүстік» өңірлік қолбасшылығының өкілдері сарбазға ешқандай қысым көрсетілмегенін айтады. Олардың сөздерінше, Ордабек әскерде жүрген алты айда үнемі дәрігерлердің бақылауында болыпты. Өйткені, алғашқы аптада-ақ оның ерсі қылықтарын байқаған. Сондықтан арнайы мамандардың көмегіне жүгінген.

Оқи отырыңыз: «Құлағына ине тығып, темекінің шоғын басқан»: Ақтаудағы «Теңіз жаяу» әскерінде үшінші сарбаз есінен адасып кетті

«Ұрып-соғу болған жоқ. Егер мұндай күдіктері болса, құқық қорғау органдарына жүгінуге болады. Олар бәрін тексереді. Кінәлі адамдар анықталса, жауапкершілікке тартылады», – деді Ұлттық ұланның «Оңтүстік» өңірлік қолбасшылығы басшысының орынбасары Ниязтай Әлкешов.

Шенді қатардағы жауынгердің денсаулығында кінәрат барын ата-анасы әу баста-ақ білгенін айтады. Соған байланысты үнемі хабарласып, жағдайын сұрап отырыпты.

×
Бұл желілік ресурстың ақпараттық өнімдері 18 жастан асқан адамдарға арналған.