Үш көлікті айдап кеткен: Талдықорғанда ұрланған көлікпен қашқан оқушы ұсталды

Azattyq Rýhy

Полицейлер ұрланған көлікпен қашып кетпек болған жасөспірімнің ұсталған сәтін видеоға түсіріп алған

Талдықорған қаласының полицейлері кәмелетке толмаған көлік ұрысын ұстады. 16 жастағы жасөспірімге үш көлікті ұрлады деген айып тағылды, деп хабарлайды Azattyq Rýhy.

Облыстық полиция департаментінің мәліметінше, тәртіп сақшылары ұрланған шетелдік көлікпен қашып кетпек болған көлік ұрысының ұсталған сәтін видеоға түсіріп алған. Патруль қызметкерлері күдіктіні көліктен шығып қашып кеткенше қуып, көпқабатты үйлердің ауласында қолға түсірді.

«Ұсталған оқушының Mitsubishi Galant, BMW және Mazda-626 ұрлығына қатысы бар екені анықталды. Аталған дерек 16 мамырда тіркелді. Көліктердің бірі Алматы қаласының шетінен, екіншісі Көксу ауданындағы Алғабас ауылының маңындағы арықтан табылды», - делінген ПД хабарламасында.

Қазіргі уақытта ҚР Қылмыстық кодексінің 200-бабы (көлік айдап әкету) бойынша қылмыстық іс қозғалды. Ұсталған жасөспірім уақытша ұстау изоляторына қамалды.

Айта кетерлігі, жасөспірім толық емес отбасынан шыққан. Белгілі болғандай, кәмелетке толмаған баланың анасы жалғыз өзі 4 баланы тәрбиелеп отыр. Жастығына қарамастан, күдікті түрлі құқықбұзушылық жасағаны үшін бірнеше рет полиция бөліміне жеткізілген.

 
×
Бұл желілік ресурстың ақпараттық өнімдері 18 жастан асқан адамдарға арналған.