Атырауда қаңғыбас иттер жасөспірім қызды талап тастады
Облыстық балалар ауруханасына 13 желтоқсан күні ауыр күйде түскен
Атырау облысында төрт ит жасөспірім қызды талады. Қазір оның жағдайы ауыр. Бұл туралы Azattyq Rýhy ATPress.kz-ке сілтеме жасап хабарлайды.
Облыстық балалар ауруханасына 2008 жылы туған қыз 13 желтоқсан күні сағат 19:50-де жағдайы ауыр күйде түскен.
Дәрігерлердің айтуынша 13 жастағы қыздың сол жақ иығы, беті, маңдайы мен параорбитальді аймағы қатты жараланған.
«Науқастың екі иығының, білегінің, буындары мен санының терісі қатты жараланған. Қазір жағдайы тұрақты ауыр, жансақтау бөлімінде жатыр», - деп хабарланды денсаулық сақтау басқармасының баспасөз қызметінен.
Атырауда биыл 11 айдың ішінде облыстық балалар ауруханасына жануарлардың шабуылына тап болған 380 бала келіп түскен. Олардың 152-сі қаңғыбас иттердің, 183-і үй иттерінің, 15-і көше мысықтарының, тағы 23-і үй мысықтарының талауына түскен.
