Қазіргі уақытта тиісті сараптамалар тағайындалды
Атырау қаласында жолаушылар тасымалдайтын екі бірдей автобус жанып кетті, деп хабарлайды Azattyq Rýhy.
Облыстық төтенше жағдайлар департаментінің мәліметінше, бір автобус Баймұханов көшесінде өртенген.
«ТЖД 101 пультіне 22 қараша күні сағат 18:30-да Атырау қаласындағы «Вокзал маңы- 3А» шағынауданында автобустың өртенгені туралы хабар түсті. Өрт сөндірушілер М.Баймұханов көшесінде «ПАЗ» автобустың электр желісінің қысқа тұйықталуы салдарынан отқа оранғаны анықталды. Жалынды сөндіруге департаменттің 10 қызметкері мен 2 арнаулы техникасы жұмылдырылды», - делінген хабарламада
Өрт сағат 18:39-да ауыздықталып, сағат 18:41-де сөндірілген. Қаза болғандар мен зардап шеккендер жоқ. Алдын ала болжам бойынша, өрт электр сымдарының қысқа тұйықталуынан болған.
Сондай-ақ сағат 18.35 шамасында Бергалиев көшесінде «ПАЗ» маркалы тағы бір автобус өртенген.
«Жүргізушінің айтуынша, автобус ішінде бірден оттың иісі шыққан. Артынша қозғалтқыш бөлігінен өрт шыққан. Жолаушылар дереу автобустан шығарылды», - делінген хабарламада.
Бұл оқиғада да зардап шеккендер болған жоқ.
Автобус түгелдей жанып кетті. Қазіргі уақытта тиісті сараптамалар тағайындалды.