Бес адамның өлімі: Нұр-Сұлтанда жол апатынан соң қашып кеткен күдікті ұсталды

30 қыркүйек күні елордада жантүршігерлік көлік апатынан 5 адам мерт болған болатын. Бүгін аталған жағдайға қатысты тергеу барысы айтылды, деп хабарлайды Azattyq Rýhy.  

ІІМ тергеу департаментінің басшысы Санжан Әбілов 30 қыркүйекте Нұр-Сұлтан қаласында көпірде болған жол апатының мән-жайы туралы айтып берді. 

«Иә, аталған жол-көлік оқиғасы қоғамды бей-жай қалдырмады. Қазіргі таңда елорданың Полиция департаменті қылмыстық іс қозғады. Нақты айтқанда, Қылмыстық кодекстің 345-бабының 4-тармағына сәйкес жол ережесін бұза отырып, 2 немесе одан да көп адамның өліміне себеп болу және 347-баптың 1-тармағына сәйкес оқиға орнынан кетіп қалуға қатысты тергеу жүріп жатыр. Жол апаты орнынан қашып кеткен күдікті ұсталды. Күдікті деп танылған 19 жастағы елорда тұрғыны бүгінде 2 айға уақытша қамауға алынды. Жол апатының уақытына келсек, ол бізде нақты тіркелген. Түнгі сағат 00:18-де болған. Бұл - біздегі ресми дерек», - деді  Санжал Әбілов.

Еске сала кетсек, аталған жантүршігерлік апат 30 қыркүйек күні түнде болды. «Toyota Camry» автокөлігінің 19 жастағы жүргізушісі Есіл өзенінен өтетін көпірден Сарайшық көшесіне қарай жүріп келе жатып, жылдамдық режімін сақтамаған. Соның салдарынан көлік жүргізушісімен қатар тағы 4 адам жан тапсырды.