Солтүстік Қазақстанда аққу атқан күдікті ұсталды

СҚО-да полицейлер Қызыл кітапқа енген сұңқылдақ аққуды атқан күдіктіні ұстады. 4 қыркүйектен бастап жүргізілген Айыртау ауданында егіс алқабына жақын ағаш дайындау бригадасының жанында сұңқылдақ аққудың қалдықтары табылды.

Тергеу барысында бригадасы жұмысшыларының бірі Қызыл кітапқа енген құсты заңсыз атуға қатысы бары анықталды. Күдікті Ғ.Мүсірепов атындағы ауданның 32 жастағы тұрғыны болып шықты. Оқиға орнын тексеру кезінде өлтірілген аққудың қалдығы, дара ұңғылы 16 калибрлі «ИЖ-18» қаруы, атылған гильза мен оқталған патрон алынды.

Аталған факті ҚР Қылмыстық кодексінің 337-бабы 4-бөлігі «Заңсыз аңшылық» бойынша сотқа дейінгі тергеп-тексерулердің бірыңғай тізіліміне енгізілді.

СҚО ПД Жергілікті полиция қызметі басқармасының бастығы полиция подполковнигі Айдын Байматовтың мәліметінше, облыста экологиялық қылмыс саласындағы 17 қылмыстық іс тіркелді. Одан бөлек аң аулау қағидаларын бұзу (414) және балық аулау қағидаларын бұзу бойынша (273) жағдайлар тіркелген.