Ақсуда темір ұрлап жүргендер ұсталды
Оларға қатысты сотқа дейінгі тергеу жүргізілуде
Ақсуда темір ұрлап жүргендер ұсталды, деп хабарлайды Рavlodarnews.kz.
Павлодар облыстық полиция департаменті баспасөз қызметінің мәліметінше, құқық қорғау органдарына Ақсу қаласының тұрғынынан ЖШС-нің аумағынан металл құбырлар ұрланғаны туралы қоңырау түскен. Сол күні полицияға тағы бір ауылдың тұрғыны үйінен металл қоршау ұрланғаны туралы арызданған.
"Полицейлер бірқатар іс-шаралар өткізді. Нәтижесінде тәртіп сақшылары қаскүнемдерді ізін суытпай ұстады. Олар ұрланған заттардың көзін жойып үлгермеген екен", - деді Ақсу қаласы полиция бөлімінің бастығы Мыңбай Асылбеков.
Айта кетерлігі, облыста 94 металл қабылдау пункті жұмыс істейді. Олар бойынша құқық қорғау органдары үнемі профилактикалық рейдтер жүргізеді.
