Үш әскери қызметші құтқарылды, олардың біреуі ауруханаға түсті
Каспий теңізінде оқу-жаттығу барысында 19 әскери қызметкер суға кетті. Өкінішке қарай, қайғылы жағдайды Қорғаныс министрлігі растап, 9 адамның мәйіті табылғанын хабарлады, деп жазады Azattyq Rýhy.
Оқиға бүгін, 24 қыркүйек күні Маңғыстау облысында Қазақстан Республикасы Қарулы күштері Әскери-теңіз күштерінің оқу-жаттығуы кезінде Каспий теңізінің жағалауында болды.
«Оқу-жауынгерлік міндеттерді орындау барысында ауа райы күрт нашарлап, 19 әскери теңізге ағып кетті. Өкінішке қарай, тоғыз сарбаз қаза тапты. Үш әскери қызметші құтқарылды, олардың біреуі ауруханаға түсті. Қалғандары әлі хабар-ошарсыз», – делінген Қорғаныс министрлігінің хабарламасында.
Оқиға орнына құтқару қызметтерінің күштері мен құралдары дереу жеткен көрінеді. Іздестіру-құтқару жұмыстарына Әскери-теңіз күштерінің, Төтенше жағдайлар министрлігінің бөлімшелері, авиация және басқа да тиісті қызметтер тартылған.
«Оқиғаның барлық мән-жайын анықтау және іздестіру-құтқару жұмысын үйлестіру үшін оқиға орнына Қазақстан Республикасының Қорғаныс министрі Дәурен Қосановтың басшылығымен Қорғаныс министрлігінің комиссиясы шұғыл аттанды. Қазақстан Республикасының Қорғаныс министрлігі қаза болған әскери қызметшілердің туған-туыстары мен жақындарына қайғырып көңіл айтады. Қаза болғандардың отбасыларына қажетті барлық көмек пен қолдау көрсетіледі. Іздестіру жұмыстарының барысы мен әскери қызметшілердің жағдайы туралы қосымша ақпарат деректер түсуіне және расталуына қарай беріледі», – делінген министрліктің агенттік тілшісіне берген пікірінде.